SERENO: "WALA AKONG DAHILAN para magbitiw SA PUWESTO"

Si Chief Justice Maria Lourdes Sereno ay muling nanindigan na siya ay hindi susuko at magbibitiw sa pwesto.

Siya ay humarap sa kanyang mga taga-suporta sa University of the Philippines (UP) sa Diliman, Quezon City kahapon.

Wika ni Sereno, ilang beses na siyang sinabihan nang palihim at maging sa harap ng publiko na kusa nang bitiwan ang kaniyang posisyon.

Ngunit sa kabila nito, wala daw nakikitang dahilan ang punong mahistrado para gawin ito dahil ayon sa kaniya, ang lahat ng kaniyang ginawa mula nang siya ay maitalaga bilang associate justice noong 2010 ay walang bahid ng malisya at tapat sa kaniyang tungkulin.

 “Sabi ko po lahat ng ginawa ko simula pa noong ako’y na-appoint na associate justice ay wala po ni isang bahid ng malisya. Lahat po ginawa ko nang tapat ang aking tungkulin. I went over and beyond the normal work load,” ani Sereno.

Hindi rin aniya siya matitinag hangga’t hindi siya iniiwan ng kaniyang mga taga-suporta, at hangga’t ang araw ay sumisikat sa silangan at bumababa sa kanluran, naniniwala siyang mananaig ang plano ng Diyos.

 “Ako po ay niluklok upang pangalagaan ang hustisya, bantayan ang independensya ng hudikatura, pangalagaan ang mga kawani ng hudikatura at ilatag ang suno-sunod na reporma sa hudikatura,” dagdag ni Sereno.